Suzanne Lebeau é unha das voces máis importantes do teatro infantil e xuvenil de todo o mundo. Ao longo da súa carreira cuestionou os límites do que se pode e non se lle pode contar aos nenos e mozos. En 1975 fundou a compañía Le Carrousel, que deixou pegada no público novo de todo o mundo. Unha muller que fomentou, a través da teoría, a pedagoxía e a práctica, a reivindicación dun teatro infantil e xuvenil responsable, esixente de si mesmo, con gran voo poético e dignidade social. Un teatro que non renuncia á crítica a este mundo no que vivimos, mozos e maiores: un mundo que, segundo as súas propias palabras, é cruel, tenro, complexo e contraditorio.