Cervantes dedica un portal a ASSITEJ-España
XaneiroDía Mundial do Teatro para a Infancia e a Xuventude.
www.cervantesvirtual.com/portales/assitej/ ou ben http://bib.cervantesvirtual.com/seccion/bibinfantil/
20 de marzo de 2012. No Día Mundial do Teatro Infantil e Xuvenil, a Biblioteca Virtual Miguel de Cervantes estreou un portal dedicado ao Centro Español da Asociación Internacional de Teatro Infantil e Xuvenil (ASSITEJ).
ASSITEJ nace en 1965 da consideración do teatro como expresión artística que ten o poder de unir a persoas de todo o mundo e que xoga un papel fundamental no desenvolvemento da sensibilidade e da capacidade crítica das novas xeracións. Presente en máis de 80 países, comparte coa UNESCO a promoción e defensa do dereito de acceso á cultura da infancia e da mocidade e conta desde 1966 cunha filial española.
ASSITEJ-España traballa para o desenvolvemento do teatro infantil e xuvenil no noso país. A concesión de premios á creación e investigación, a posta en marcha de catro fondos editoriais, a creación dunha biblioteca e a fundación dun arquivo documental relevante son algunhas das súas actuacións máis salientables.
O novo portal de Cervantes, froito dun convenio asinado a finais de 2011 entre ASSITEJ-España e a Fundación Biblioteca Virtual Miguel de Cervantes, recolle unha colección de textos teatrais dirixidos á mocidade e á infancia, escritos por dramaturgos españois como Juan Cervera, Luis Matilla, Tomás Afán, Jesús Campos, Alberto Miralles, Antonia Pascual Bueno e Itzia. Este catálogo seguirá medrando no futuro, tanto cos fondos da biblioteca da Asociación como coas achegas que seguen facendo os seus socios. Trátase de textos dramáticos así como de investigación e estudo do teatro infantil e xuvenil.
O portal tamén ofrece as actas de diversas xornadas organizadas pola Asociación dende 1967 e os boletíns nacidos en 1970 (Boletín AETIJ) e 1973 (Boletín Iberoamericano de Teatro Infantil e Xuvenil, que inclúe investigacións, textos creativos e información sobre teatro infantil e xuvenil).
Biblioteca Virtual Miguel de Cervantes
A Biblioteca Virtual Miguel de Cervantes (www.cervantesvirtual.com) foi creada en 1999 por iniciativa da Universidade de Alacante, o Banco Santander e a Fundación Marcelino Botín, e na actualidade desenvólvese baixo a tutela da Fundación Biblioteca Virtual Miguel de Cervantes, presidida polo escritor Mario Vargas Llosa, Premio Nobel de Literatura 2010; ofrece acceso gratuíto a máis de 140.000 rexistros bibliográficos a través de Internet.
