Contacontos é un dos oficios máis antigos do mundo. As historias viaxan de boca en boca por toda a humanidade, aquí e alí, e a nosa tarefa é coñecelas e dalas a coñecer; dar vida a esa longa cadea de historias, imaxes, emocións, arquetipos, mitos... Voces de onte e de hoxe que falan nos nosos oídos para revelar o que somos os humanos e o que podemos ser.

Os tristes cren que contar historias é unha profesión morta. Pero hoxe está máis viva que nunca: nas rúas, teatros, escolas, comidas familiares, incluso empresas, encántanos escoitar historias. Se nunca o probaches, dálle unha oportunidade. Asegurámolo porque levamos máis dunha década achegando historias á xente, e hai quen as escoita cativada dende o primeiro momento, pero tamén quen nos mira ao principio con certa receo... e pouco despois, están a rir, a soñar, a chorar, a imaxinar como todos.

Somos Eva e Nacho, expertos en literatura oral, tanto pola formación académica como pola experiencia profesional e docente. Levamos anos contando historias, tanto para adultos como para nenos, en escolas e institutos, centros culturais, teatros, cafeterías e bares. É moi posible que nos coñeceras antes no grupo O Aspersor.

En De boca en boca collemos historias de narrativa oral tradicionais de todos os pobos, co seu significado, a súa esencia, as súas raíces, e facémolas nosas, para despois facelas túas, nun espazo e para un público do século XXI. 

Estamos do lado do folclore, da comunicación oral, do saber antigo, da imaxinación e da realidade.